berlin

GRAJ JE ZREL A SVET JE VREL

Posted on : 12-07-2015 | By : admin | In : UMNE KRIJESNICE

0

piše: Božica Jelušić
0001111227_s_0_f7mls5Da vam nekaj velim: Dok smo bili mali, jedva se čekalo leto: Vidovo, Alojzijevo, to su bili pravi sveci, kajti potlam toga ni više bilo škole ni vučenja niti za vuha natezanja ni packi po prstima i šibom po riti!

Mi smo imali stroge školnike, to sem več rekla, pak sem stopram i ja ostala jemput „na reštu“, kajti sem ni mogla popamtiti nekaj z one pesmice SAVILA SE BIJELA LOZA VINOVA …

Ono kak ide po redu: gdfa je loza pupala, listala, grozdje zorilo, i kojekaj, baš me vezda briga, neču ni rteči kolike sem pesmice potlam popamtila, za nikaj, se na vekšu slavu Božju, kak bi se reklo.

Ergo, tak smo išli na ferije, kupali se na Dravi, hrčkali po potoku, konoplje namakali, po Žutilu bežali kak cucki, pom tavanu se kak mački smicali, jeli jabuke žetvenke, rane slive, julskoga muškata, duda, mandale, ribizla i ogrozda, a za obed graška z noklicama i kokošjema drapama, mlade mavune z vrnjem, štruklje z bučom i makom, jojojoj, gda se samo setim, v glavi mi se zavrti od miline! V nedelju ideš k baki, dobiš crlenu „dvadesetaču“, pitaju te jel se doma svađaju, nekaj ti malo još v žepe porinu i to je to …

Igrali smo se v staroj ledari, v košu „kukuružnjaku“, v plevnjaku i hambaru. Debela šnita kruveka, gore mast i cukor i nišče za te ne pita celi den! „Jel‘ ti vruče, jel‘ ti dosadno?“ – to deca z mojega vremena ni dendenes ne razmu kaj znači na našemu jeziku.

Takvi jeni bedaki za školom, kakva sem ja bila, čitali su na parmi, pod bleščečem, užarenim krovom, ili na dudu, gdi me nišče ni mogel najti i našibrati, ako je dvor ostal nepometen, a koprive za pure nenasečene i melja kukuruzna nepoparena. A kvragu, na selu navek ima posla, lepo je to Mirek dolenec napisal v onoj pesmici dok hoče iti na Dravu, pak ga z poslom tak zajaše i zakobaču, kaj mu celi den pobegne i samo dečja žalost ostane…

Vezda pak, tak je peklenski vruče, graj je zrel (ili još ni) a svet je vrel, sega mi je prek glave, živim zatablana i spominjem se z VRTIZRAKOM iliti ventilatorom, gledim na vuru i čekam da večer dojde. To mi bu znak da sem denešnjni den preživela i da zutra pak budem rivala kamena na breg, kak onaj Sizif, kajti si pametnešega života nisem znala zebrati. Ampak, sejeno, bolje i to, nego da z balkona opanem,kakti jena moja tobož pajdašica ili da prek noči zgubim bogatstvo na burzi, kajti jedno ni drugo nemam, blago si ga meni, i vama koji ovo čitate!

Write a comment